Euskal Sozialistak Legebiltzarkide Taldeak, Garoñaren itxiera exijitzeko Ganberaren laguntza lortu du, Rajoyren Gobernuak zentral nuklearra ixteko kudeaketan erakutsi duen “iluntasunaren, kontraesanen eta zentzugabekerien aurrean”.

Taldearen idazkari nagusiak, Txarli Prietok, ebazpen hori sustatu du, Gobernu zentralak zenbait erabaki “kontraesankor” hartu baditu ere eta legez aurreikusitako epeak errespetatu ez dituen arren, betiere enpresa jakin batzuen interes ekonomikoen alde egiteko.  “Iskanbila politiko bat da, Garoña ez da beharrezkoa”, azpimarratu du Prietok.

Sozialisten ekimenez onetsi duten mozioaren bidez, Espainiako Gobernuari exijitzen diote albo batera utz dezala Nuclenorri Santa María de Garoña zentral nuklearra ustiatzeko baimena berritzeko beste data bat emateko asmoa eta, beraz, jarduerarekin behin betiko amaitu dezatela eta azpiegitura nuklearra desegiteko lanekin has dezatela aurreikusita dagoen datarako, 2013ko uztailaren 6rako alegia.

Gainera, Legebiltzarrak bat egin du Santa María de Garoña zentral nuklearrarekin jarraitzearen aurka erakundeek egin dituzten ekimen eta aldarrikapen guztiekin eta Eusko Jaurlaritzari gauza bera egin dezala eskatzen dio.  Ebazpenak, gainera, ondokoa ere jaso du: Ganbera bat dagoela tokiko sektore eta eragileek luzapena dela-eta adierazi duten kezkarekin eta salatu egin du Euskadirako arrisku argia litzatekeela, Arabako herriak oso hurbil daudelako. Gainera, Santa María de Garoña ixteko egiten diren herri-ekimen guztien alde agertuko da.

Aldeztutako sozialisten proposamenak gogoratu du badagoela Ekonomia Biziberritzeko eta Enplegua sortzeko Neurrien Plan bat, 2009ko azaroaren 20an Ministroen Kontseiluak onetsitakoa, eta Espainiako Gobernuari eskatu dio hurbiltasunagatik eragindako Udalei plan horretan parte hartzeko aukera eman diezaien, baita zentral nuklearraren behin betiko itxiera dela-eta hurbileko udalerri laguntzeko onetsiko diren beste laguntza-plan batzuetan ere.